Bayan Muna

Nag-ukol ng malaking oras at maraming pera si Senador Mar Roxas para lalo niyang maipakilala ang kanyang sarili sa taumbayan lalo na't di lingid sa marami ang kanyang hangaring tumakbo bilang presidente. Ang pagtrato sa kanya at kay Korina Sanchez, ang kanyang kasintahan, ay maihahalintulad sa dalawang sikat na artista. Sinasabing magiging masusi si Korina para mas sumikat pa ang senador habang papalapit nang papalapit ang halalan.

Subalit lahat ito'y nabago nang magdesisyon si Mar na magparaya sa kanyang kapartido't kapwa senador na si Noynoy Aquino, ang nag-iisang anak na lalaki ng mga yumaong Ninoy at Cory Aquino.

Naging maugong ang panawagan ng ilang bahagi ng bansa para tumakbo si Noynoy upang maipagpatuloy ang laban ng kanyang mga nasirang magulang. Isang panawagan na posibleng magpapagulo pa sa magulong buhay-pulitika ng bansa.

Noong isang linggo, ipinahayag namin ang aming pananaw sa pambansang eleksyon at nanawagang matutong magsakripisyo ang mga may interes na tumakbo at magsanib-puwersa sa iba pang may balak kumandidato. Nagpapasalamat kami at may isa nang tumugon sa panawagang ito.

Di biro ang pagsasakripisyo ng ito ni Roxas. Magkaganoon pa man, umani siya ng aming respeto gayon din ng iba pa niyang kababayan. Dalangin namin na marami pa ang sumunod sa kanyang halimbawa.

Uunlad lamang ang Pilipinas kung magiging mas matimbang sa atin ang kapakanang-bayan kaysa sa ating mga pansarili at pinakatatagong agenda.

Hindi Ka Nag-iisa

Dalawampu’t anim na taon nang paslangin si Ninoy Aquino, naging bahagi ng kanyang lamay, libing, at mga sumunod na pagtitipon ang mga katagang “Hindi ka nag-iisa.” Sa pagkamatay ni Ninoy, nagbuklud-buklod ang sambayanang nakilala kay Ninoy (at sa kanyang mga naulila) ang sarili nilang karanasan sa mapang-aping diktadurya.

Dalawampung araw nang nakakalipas nang muling ipadama ng bayan ang kanyang pakikidalamhati nang sumakabilang-buhay ang balo ni Ninoy, ang babaeng nagpatuloy ng kanyang laban.

“Hindi ka nag-iisa.”

Ito ang gamot na kung lagi nating iinumin ay pupuksa sa mga sakit gaya ng crab mentality at pagkakanya-kanya na dinaranas natin bilang mga indibidwal at bilang isang sambayanan. Sa mga pag-uugaling ito matagal bago napatalsik ang mga dayuhang mananakop gayon din ang mga tiwaling Pilipinong namuno sa ating bansa.

“Hindi ka nag-iisa.”

Ito na marahil ang napakagandang ipaabot sa ating mga kababayan imbis na pagsamantalahan sila lalo na sa panahon ng kahirapan at pagdurusa. Kasuklam-suklam nang masaksihan ang panloloko’t panggagamit ng tao sa kapwa-tao, gaano pa kaya ang pagtratong ganito ng Pilipino sa kapwa-Pilipino?

“Hindi ka nag-iisa.”

Sa pag-alala natin sa pagpanaw ni Ninoy, patunayan nating tunay ngang di siya nag-iisa sa kanyang paglaban para sa ikabubuti ng kanyang mga kababayan. Patunayan nating kaya pala nating magkaisa, magdamayan, at manatiling kumikilos para sa ikabubuti ng Inang Bayan.

“Hindi ka nag-iisa.”

Ito ang dapat isapuso ng sinumang nais sumunod kay Kristo; Siya mismo ay di nag-atubiling magkatawang-tao, dumanas ng lahat ng hirap ng sangkatauhan, at humarap sa kamatayan upang maipadama sa ating lahat na totoong ang Diyos ay nasa panig natin kahit madalas nating inaakalang di ito totoo.