Makisangkot

Bahagi na ng ating pananampalataya ang manalangin – nagsisimba tayo tuwing Linggo at iba pang espesyal na okasyon, nagrorosaryo tayo lalo na sa buwang ito, nagdedebosyon tayo sa mga santo, atbp. Subalit di dito nagtatapos ang ating pagiging mga Kristiyano. Kailangan nating lahukan ng pagkilos ang ating pagdarasal. Kagaya ni Jesus na ating Panginooon dapat din tayong makisangkot sa mundo.

Ang pananalanta ng magkasunod na bagyong Ondoy at Pepeng sa ating bansa ay nagdulot ng matinding dagok sa marami nating kababayan: nalubog sa tubig baha ang maraming tahanan at gusali; nasira ang maraming pananim na dapat sana’y aanihin na; marami ang binawian ng buhay.

Naniniwala ang Tanghalang Anluwage, Inc na matapos ang mga trahedyang ito, oras na para tulungang makabangong muli ang mga naapektuhan nating kababayan sa pamamagitan ng pangangalap ng pondong pantulong sa mga biktima lalo na sa mga mag-aaral sa elementarya na nangangailan ng mga school supplies upang maipagpatuloy nila ang kanilang pag-aaral.

Kumakatok kami sa inyong mga puso na makiisa sa proyektong ito. Sama-sama nating muling itaguyod ang mga nangangailan nating kababayan. Tulung-tulong tayong ipadama sa kanila na kaya nating malampasan ang anumang pagsubok sa buhay, na tayo’y naririto para sa isa’t isa, na ang Diyos ay tunay na nagmamahal at patuloy na kumikilos sa atin.

Gawa ng Tao

"Hindi Act of God, kundi Act of man." Iyan ang pananaw ng batikang arkitekto na si Jun Palafox tungkol sa pananalanta ng bagyong Ondoy sa Kamaynilaan lalo na sa mga probinsya ng Rizal: Marikina, Taguig, San Mateo, Pasig, at Cainta. Sang-ayon kay Palafox nagkaroon ng atake sa puso ang Kamaynilaan nang bumuhos ang mga ulan at umapaw ang mga dapat sana'y pagdaluyan ng tubig papuntang Laguna de Bay at Manila Bay. Hindi maipagkakaila na pawang bumabaw na ang mga daluyang ito dala na rin ng mga basurang itinatapon dito at ang pagdagsa't pagtira ng mga squatter sa pampang ng mga daluyan.

Nakakapagtaka na sa kabila ng mga pag-aaral at rekomendasyon ni Palafox at kanyang mga kasama hinggil sa pagkontrol ng pagbaha sa Kamaynilaan, nauwi lang ang lahat ng ito sa wala. At ngayon heto ang kinalalagyan ng mga kababayan nating nakatira sa Rizal.

Marami nang beses na nasasalanta ang bansa ng mga bagyo lalo na sa mga huling buwan ng taon. Marami na ring beses na nananawagan tayong pangalagaan at ipagtanggol ang ating mga kagubatan dahil kapag wala ng punong sisipsip sa mga tubig-ulan, asahan nating tayong mga nasa kapatagan ang magdurusa. Paulit-ulit na lang ang mga kaganapang ito subalit di pa rin tayo natuto.

Nasayang ang mga rekomendasyon nina Palafox dahil sa maling pulitika. Nawalan ito ng saysay dahil nagpapogi lang ang ating mga pinuno. Nabinbin ang dapat sana'y pagpapaunlad pa sa malaking bahagi ng bansa dahil hindi nagmalasakit ang ating mga lider.

Sa ganang amin, nananawagan kami sa mga kabataan na lalo pang maging mapanuri't mapagmatyag. Suriin ninyong maigi ang mga kakandidato - karamihan sa kanila ngayo'y abalang-abala na sa pagtulong sa mga nasalanta. May pahalaga ba sila sa kalikasan? Mas matimbang ba sa kanila ang pangmatagalang kaunlaran ng kanilang nasasakupan kaysa mga 'quick fix' na solusyon sa mga problema gaya ng pagbaha, pagtapon ng basura, atbp? Kaya ba nilang makinig sa mga rekomendasyon galing sa mga intelihenteng tao gaya ng mga nasa education, science and technology, at research at di basta-basta sasama sa daloy ng maruming pulitika?

Ang pagsalanata ni Ondoy ay may aral na nais ipabatid sa atin, isang aral na di natin dapat kalimutan, isang aral na dapat nating dalhin hanggang sa pagsulat sa ating mga balota sa Mayo 2010.