Merely His Servants

A missionary priest once told his fellow missionaries: "This is God's work. Full steam ahead!". Twenty-eight years ago, a group of young people from St Joseph de Gagalangin Parish came together. In their gathering, they produced what then were a novelty in the parish: a theater group and a newsletter.  The theater and newsletter were created in response to the parish's thrust of evangelization.

Commonly known as Anluwage, it became involved in the life of the parish. Theater productions were made, newsletter editions and volumes were published. It was full steam ahead, indeed.

However, not everything was rosy for the group. There was a moment when everything was put to a halt due to animosities in the parish. In spite of the setback, the group looked forward to recover. Indeed, that longing came into fruition when, in the early 2000s, anluwage.com was launched. From what was once a paper-based ministry, it has gone onto the worldwide web. 

Twenty-eight years have gone by. Through the efforts of group members and supporters, we have carried out what we believe is God's work. For indeed, He is the main mover and shaker in evangelizing all people. We are merely His servants (Luke 17:5-10). 

As we welcome another year, we thank the good Lord for calling us to share in His work. If there is one thing we would ask Him, it is the grace to keep on trusting in His love and providence. Like Joseph, the great Anluwage.

Misyonero

Dalawampu't apat na taon na ang nakakalipas nang itatag sa parokya ng Gagalangin ang Tanghalang Anluwage.  Sa mga unang buwan mula nang ilunsad ito, naging abala ang samahan sa pagtatanghal ng mga makabuluhang obra. Bukod dito – at lingid sa kaalaman ng nakakarami – pinamunuan nila ang pag-awit sa Misa sa isang lugar sa parokya na puno ng kahirapan. Linggu-linggo, kasama nila si Padre (ngayo’y Monsignor) Mario Enriquez  sa apostoladong ito. 

Marami na ring pagbabago ang naganap sa Tanghalan mula noon. Mayroong mga pagbabagong maganda’t nakapagpaunlad sa kanya, mayroon din namang mga hindi.  Ganoon pa man, patuloy pa ring “nagtatanghal” ang samahan sa pamamagitan ng ating website.

Sinasabing likas na sa Simbahang Katolika ang pagiging misyonero.  Nakaugat ito sa huling habilin ni Jesus na humayo ang Kanyang mga alagad at ipahayag ang Mabuting Balita sa lahat (Marcos 16:15). Puspos ng Banal na Espiritu, tinupad ng mga alagad ang iniutos sa kanila ng Panginoon kahit buhay pa nila ang maging kapalit.

Taglay ang isang pusong nagpapasalamat, hinihiling namin ang biyaya ng Poong Maykapal na maipagpatuloy pa rin naming itanghal ang liwanag ni Kristo, maipagpatuloy na ipadama ang ligaya ng Kanyang Mabuting Balita sa lahat lalo na sa mga nananabik nito. Samahan ninyo kaming muli sa misyong ito!

Taon ng mga Relihiyoso

Ngayong 2015, ipinagdiriwang ng buong Simbahan ang Year of Consecrated Life o Taon ng Itinalagang Buhay. Sa selebrasyong ito, hiniling ni Pope Francis sa mga pari, madre, at hermanong napapabilang sa mga religious congregrations o ordeng relihiyoso na gisingin nila ang daigdig sa pamamagitan ng kanilang pananampalataya, kabanalan, at pag-asa.

Sa buhay ng Simbahan, ginising ng mga ordeng relihiyoso ang sangkatauhan.  Halimbawa na rito ang Dominican Order na itinatag ni Santo Domingo de Guzman upang ipahayag ang Mabuting Balita ni Kristo at kalabanin ang maling turo na ikinakalat ng mga erehe noong ika-15 siglo.  Nariyan din ang mga Jesuit Order na itinatag naman ni San Ignacio de Loyola. Sila naman ay nakilahok sa Counter-Reformation para muling buhayin ang pagiging Katoliko sa iba't ibang istruktura ng Simbahan.

Sa ating bansa, mula pa noong panahon ng mga Kastila hanggang sa kasalukuyan, sangkot sa iba't ibang gawain ang mga relihiyoso. Naging masigasig sila sa pagbuo ng mga bayan at parokya. Naging maalab din sila sa pagtayo ng mga paaralan gaya ng Adamson University, Ateneo de Manila University, Colegio San Agustin, Colegio de San Juan de Letran, De La Salle University, Don Bosco Technical College, Immaculate Conception Academy, La Consolacion College, St. Paul's College, San Juan de Dios Educational Foundation, Santa Isabel College, University of Santo Tomas, atbp. 

Bukod sa edukasyon, nandiyan din ang mga ospital at bahay-ampunan na kanilang pinamamahalaan gaya ng UST Hospital, St. Martin de Porres Charity Hospital, Home of Joy, Hospicio de San Jose, at PREDA Foundation.  

Mayroon din namang nakikilahok sa mga isyu gaya ng kalikasan, katarungan, kahirapan,kapayapaan, atbp. Mayroon ding nagbibigay ng retreats at nagpapahayag ng Mabuting Balita sa iba't ibang anyo ng media. 

Binuksan din nila ang kanilang mga simbahan, kapilya, o monasteryo sa madla gaya ng Baclaran Church, Our Lady of Mt. Carmel Shrine, San Agustin Church, at Monasterio de Sta. Clara. Hindi rin siguro natin makakalimutan ang kanilang iniaambag sa mga awitin sa Misa gaya ng mga Heswitang Fr. Eduardo Hontiveros (SLN) at Fr. Manoling Francisco.

Bagama't nagkaroon ng batik ang ilang relihiyoso dulot ng mga pang-aabuso ng kanilang mga kasamahan noong panahon ng mga Kastila, hindi ito sapat para ibasura natin ang malaking tulong nila sa pagbuo ng ating kaalaman bilang mga Katolikong Pilipino, sa paggising nila sa atin sa katotohanan.

Kaisa ng Banal na Papa, na nagbuhat rin sa isang relihiyosong orden at dadalaw pa sa ating bansa ngayong Enero, ipanalangin natin na muling matuklasan ng mga kaanib ng samu't saring religious congregrations ang saya ng pagsunod kay Kristo at magsikap na maglingkod nang may ningas sa mga dukha.

Isang Dekada Na!

Natatangi rin ang bagong taon para sa amin dahil, sa awa at paggabay ng Diyos, ipinagdiriwang ng anluwage.com ang kanyang ika-sampung anibersaryo.  Parang kailan lang nang ilunsad namin ang aming website.  Sa simula, nakatuon lamang ito sa mga taga-Gagalangin, Tundo kung saan ang Tanghalang Anluwage, Inc. ay isinilang, subalit sa paglipas ng panahon, higit pa sa Tundo ang aming pinaglilingkuran.  Pangunahing taglay naming balita at lakas ay ang Mabuting Balita ni Kristo.  Dalangin namin na sa pagpasok ng bagong dekada, patuloy kaming maging tapat sa aming ministeryo upang kagaya ng mga relihiyosong pari, madre, at hermano, magising din namin ang daigdig sa liwanag ni Jesus. Salamat po sa inyong pagtangkilik at panalangin. Patuloy ninyo kaming samahan, mga kapatid!

Taon ng Pananampalataya

Sa ika-11 ng Oktubre ng taong kasalukuyan, ilulunsad ng Simbahang Katolika ang Taon ng Pananampalataya. Magsisimula ang pagdiriwang na ito sa ika-50 anibersaryo ng pagbubukas ng Vatican Council II at magtatapos sa ika-24 ng Nobyembre 2013, Kapistahan ni Kristong Hari.

 

Maraming pagbabagong idinulot sa buhay ng Simbahan ang Vatican Council II.  Sa larangan ng liturhiya halimbawa, mas pinaigting pa ang pakikiisa ng mga layko sa banal na pagdiriwang.  Sa larangan ng Banal na Kasulatan at Pagpapahayag ng Diyos, lalong pinag-ibayo ang pag-aaral ng Salita ng Diyos bilang pagkilala sa masusing papel nito.  Bunga din ng nasabing konsilyo ang pagkilala sa ugnayan ng Simbahang Katolika sa ibang relihiyon at ang papel ng mga obispo bilang isang kapulungang humalili sa mga Apostol sa pangangaral at pamumuno sa Simbahan sa pangunguna ng Banal na Papa.

 

Sa Main Building ng UST, na madalas mapagkamalang isang simbahan dahil sa malaki nitong tore na may krus sa tuktok, may tatlong estatwa na pinamagatang 'Tria Haec' (Itong Tatlo).  May hawak na krus ang estatwang napapagitna at nakatayo sa mas mataas na pedestal. Sumasagisag ito sa 'Fides' (Pananampalataya). Sa kanan nito, may hawak na angkla ang estatwa, sagisag ng ,Spes. (Pag-asa). Sa kaliwa naman nito, makikita ang estatwa na nagpapakain ng isang animo'y mahirap na bata. Ito ang sagisag ng 'Caritas' (Pag-ibig). Kinikila ang tatlong ito bilang mga theological virtues dahil sila'y mga biyaya sa atin ng Diyos para sa ating kaligtasan.

 

Sinasabing ang pananampalataya ay kaloob ng Diyos upang maniwala tayo nang walang pag-aalinlangan sa anumang ipahayag Niya sa atin. Ang pananampalataya ay isang handog at dahil diyan, nasa ating mga kamay kung ano ang gusto nating gawin dito.

 

Nakakalungkot isipin at masaksihan kung paanong ang pananampalatayang ito ay ipinagwawalang-bahala o kaya'y itinatakwil ng marami sa ating paligid. Nakakadismaya't nakakawala ng pananampalataya ang pagkakasangkot ng dalawang alagad ng Diyos sa magkahiwalay na iskandalong kumalat sa media kamakailan lang.Minsan, ganito rin ang ating ginagawa.  Mamimili tayo ng mga aral na sang-ayon sa atin at ibabasura ang di kanais-nais sa atin.

 

Sa pagdiriwang ng Taon ng Pananampalataya, hilingin natin sa Diyos na lalo pang lumalim ang ating ugnayan sa Kanya sa pamamagitan ng Banal na Kasulatan, pagtanggap ng mga sakramento lalo na ng Banal na Komunyon, at pakikiisa sa mga gawaing pansimbahan.

 

Sa ganang amin sa Tanghalang Anluwage, bilang taus-puso pasasalamat sa Poong Maykapal sa ika-21 anibersayo namin ngayon, sisikapin naming patuloy na maipahayag ang Kanyang Salita sa samu't saring anyo ng aming paglilingkod sa Simbahan upang lalo pang matuklasan, mapagyaman, at maipahayag ang ganda ng ating pananampalataya.

 

 

Makisangkot

Bahagi na ng ating pananampalataya ang manalangin – nagsisimba tayo tuwing Linggo at iba pang espesyal na okasyon, nagrorosaryo tayo lalo na sa buwang ito, nagdedebosyon tayo sa mga santo, atbp. Subalit di dito nagtatapos ang ating pagiging mga Kristiyano. Kailangan nating lahukan ng pagkilos ang ating pagdarasal. Kagaya ni Jesus na ating Panginooon dapat din tayong makisangkot sa mundo.

Ang pananalanta ng magkasunod na bagyong Ondoy at Pepeng sa ating bansa ay nagdulot ng matinding dagok sa marami nating kababayan: nalubog sa tubig baha ang maraming tahanan at gusali; nasira ang maraming pananim na dapat sana’y aanihin na; marami ang binawian ng buhay.

Naniniwala ang Tanghalang Anluwage, Inc na matapos ang mga trahedyang ito, oras na para tulungang makabangong muli ang mga naapektuhan nating kababayan sa pamamagitan ng pangangalap ng pondong pantulong sa mga biktima lalo na sa mga mag-aaral sa elementarya na nangangailan ng mga school supplies upang maipagpatuloy nila ang kanilang pag-aaral.

Kumakatok kami sa inyong mga puso na makiisa sa proyektong ito. Sama-sama nating muling itaguyod ang mga nangangailan nating kababayan. Tulung-tulong tayong ipadama sa kanila na kaya nating malampasan ang anumang pagsubok sa buhay, na tayo’y naririto para sa isa’t isa, na ang Diyos ay tunay na nagmamahal at patuloy na kumikilos sa atin.