Bagong Ikaw, Bagong Daigdig

Nakakatawag-pansin ang nilalaman ng isang poster kaugnay ng Laudato Si, isang kilalang encyclical ni Pope Francis na nakatuon sa pangangalaga sa ating daigdig. May tatlong panawagan ang poster: Mamuhay nang marunong, mag-isip nang malalim, umibig nang mapagbigay.

Bagong Taon na naman! Nakaugalian na nating salubungin ito na puno ng pagsasaya at pag-iingay, pag-asa at pananampalataya, pasasalamat at pagbabalik-tanaw. 

Sa ating pagbabalik-tanaw, makikita natin ang maraming pagkakataong naging mabuti sa atin ang Panginoon. Marami Siyang biyayang ipinagkaloob sa atin. Halimbawa na lang ang oras. Paano natin ginamit ang biyayang ito? Ginamit ba natin ito para pag-usapan ang kapwa at hanapan sila ng butas o ginamit natin ito para maghanap-buhay o pagyamanin ang ating kaalaman?

Marami rin tayong hinarap na pagsubok noong nakaraang taon. Marami tayong desisyong ginawa. Tama ang iba, subalit mayroon ding mga mali. Nagkamali kaya tayo dahil minadali natin ang ating pagpapasya? Nagkamali kaya tayo dahil hindi natin pinag-isipang maigi ang magiging resulta ng ating mga gawi? Nagkamali kaya kayo dahil pinangunahan tayo ng galit o inggit? Naimpluwensiyahan kaya tayo ng mga fake news na nagkalat sa social media? Nasulsulan ba tayo ng mga kapos din sa karunungan?

Nilikha tayo upang umibig dahil ang lumikha sa atin ay pag-ibig (1 Juan 4:8). Nasasalamin ba sa ating pag-ibig ang pag-ibig ng Diyos? Nagbibigay-tulong lang ba tayo dahil masarap sa pakiramdam, kagaya noong Pasko? Ano ang turing natin sa mga tinutulungan natin? Mga pabigat sa buhay sana nating masarap? Mga kasangkapan para magpasikat? Mga de susing kalaruan?

Sa ating pagsalubong sa Bagong Taon, pagsikapan nating dinggin at isabuhay ang panawagan ng poster. Kung naging mangmang, mababaw, at makunat ang ating 2017, hindi ba panahon na para magbago na tayo? Kung magagawa natin ito, mapapangalagaan natin hindi lamang ang ating mga sarili, kundi ang ating mga mahal sa buhay, ang pamayanan, ang lipunan, at ang daigdig.  Samahan nawa tayo ng Mahal na Inang Maria sa ating paglalakbay.

Isang marunong, malalim, at mapagbigay na 2018 sa inyong lahat!

Huwag Magsayang

Ipinasara ni Pope Francis ang mga bukal sa paligid ng Batikano sa gitna ng tagtuyot na kasalukuyang dinaranas ng Roma at ng iba pang bahagi ng Italya. Napabalita diumanong bumaba nang matindi ang reserbang tubig ng Roma bunsod ng kakulangan sa ulan noong Hunyo at Hulyo. Dumanas rin ang Italya ng pinakatuyong tagsibol sa loob ng 60 taon. Upang maiwasan ang isang trahedyang pangkapaligiran, bawal nang kumuha ng tubig sa Lawa Bracciano mula sa ika-28 ng Hulyo.

Maituturing ang ginawang hakbang ng Papa bilang una sa kasaysayan ng Roma. Bahagi na ng mga pook pasyalan ang mga nasabing bukal hindi lamang sa pagiging antigo at may magagandang disenyo. Ang ilan dito ay mapagkukuhanan rin ng tubig na pampatid-uhaw ng mga turista lalo na sa panahon ng tag-araw.

Ipinaliwanag ni Greg Burke, tagapagsalita ng Batikano, na ang pasya ng Papa ay naaayon sa kanyang pananaw sa ekolohiya: hindi ka maaaring magsayang at minsan ay kailangan mo ring magsakripisyo.

Dalawang taon na ang nakakalipas ng isulat ni Pope Francis ang kanyang ikalawang ensiklikal na pinamagatang Laudato si. Sa nasabing dokumento, pinuna ng Papa ang konsumerismo at iresponsableng pagpapaunlad ng ilang mga bansa, itinaghoy niya ang pagbagsak ng kapaligiran at pag-init ng daigdig, at nanawagan siya sa lahat na gumawa ng mabilis at nagkakaisang hakbang para mapangalagaan ang daigdig.

Sa ating maliliit na paraan, maaari rin tayong makapag-ambag para mapangalagaan ang ating kapaligiran. Sinasabing ang tubig ay buhay. Samakatuwid, mahalagang gamitin ito nang wasto. Imbis na gumamit ng hos sa pagdilig ng mga halaman o paglinis ng kotse, bakit hindi na lang gumamit ng lagadera o balde? Imbis na maligo sa bath tub, bakit hindi na lang gumamit ng shower o tabo? Imbis na itapon na lang sa lababo ang pinaghugasan ng bigas, bakit hindi ito gamiting pandilig ng halaman? Maraming paraan ang sinumang may malasakit.

Ang hakbang ng Papa ay pagsasabuhay ng Laudato si. Kakaibang-kakaiba sa ginawang pag-urong ni Donald Trump, pangulo ng isang makapangyarihan at mariwasang bansa, sa Paris Agreement 2015.